Gitte Langlo, som vart gjenvalt som leiar i arkitektforeninga tidlegare i vår, har skifta beite. Frå og med april har ho gått inn i Sporstøl Arkitekter AS og avslutta eit 23 års langt eigarskap og arkitektjobben i ART arkitekter og ingeniører AS.
«Vi i Sporstøl Arkitekter er godt nøgde med at Gitte er komen med på laget. Ho tilfører oss både solid arkitektkompetanse, men ikkje minst erfaring med prosjekteringsleiing i større offentlege prosjekt», seier dagleg leiar Ingvill Arhaug Bovill. Gitte har i tillegg til å vere utførande arkitekt, også hatt prosjektleiing av større lokale prosjekt for Statsbygg, Fylkeskommunen og mange av Sunnmørskommunane. Ho er ein skikkeleg lokalpatriot når det gjeld utvikling av arkitektur i fylket vårt. «Eg håpar at eg i Sporstøl Arkitekter kan operere i eit større arkitektmiljø og vere med å gjere oss meir attraktive for dei offentlege kundane. For å få til det må vi ha sterk og brei arkitektkompetanse slik at vi er konkurransedyktige i høve til dei store nasjonale og multinasjonale arkitektkontora. Våre kundar skal velje Sporstøl Arkitekter fordi vi kjenner både sunnmørsarkitekturen, det utfordrande klimaet her og kva kundane i vårt område treng av funksjonalitet og estetikk. Eg gler meg verkeleg til å jobbe i eit større og ekspansivt arkitektmiljø!». Sporstøl Arkitekter har også nettopp tilsett landskapsarkitekt, Lene Hole, og tel no 19 tilsette. «Vi har hovudkontor i Ulsteinvik, men Gitte vil både ha eige avdelingskontor på Stranda samt vere tilknytta avdelingskontoret vårt i Ålesund» i følge Ingvill, «vi er i den heldige posisjon at vi har godt med prosjekt, og vi ser stadig etter fleire dyktige tilsette».
